KAMAL: மணிரத்னம் இயக்கத்தில் கமல்ஹாசன் தனது 234-வது படமான ‘தக் லைப்’ படத்தில் தற்போது நடித்து முடித்துள்ளார். 37 வருடங்களுக்கு பிறகு இருவரும் இணைந்துள்ளதால் ரசிகர்கள் மத்தியில் எதிர்பார்ப்பு அதிகரித்துள்ளது. இதனை தொடர்ந்து கமலின் 235-வது படத்தை இயக்குநர் பா.ரஞ்சித்தும், 236-வது படத்தை இயக்குநர் நெல்சனும் இயக்க இருப்பதாக தகவல் வெளியாகியுள்ளது.
தொடர்ந்து, கமலின் 237ஆவது படத்தை பிரபல சண்டை பயிற்சியாளர்களான அன்பறிவ் (அன்புமணி, அறிவுமணி) சகோதரர்கள் இயக்க உள்ளனர். இவர்கள் ‘மெட்ராஸ்’ படத்தின் மூலம் மக்கள் மத்தியில் பிரபலமானவர்கள். இவர்கள் கன்னடம், மலையாளம், தெலுங்கு, இந்தி படங்களிலும் பணியாற்றி வருகிறார்கள்.
சமீபத்தில் இந்த படத்தின் குறித்த அதிகாரப்பூர்வ அறிவிப்பை ராஜ்கமல் பிலிம்ஸ் வெளியிட்டது. தக் லைப் திரைப்படத்திற்குப் பின் நடிகர் கமல்ஹாசன் சண்டைப் பயிற்சியாளர்கள் அன்பறிவ் இயக்கும் படத்தில் நாயகனாக நடிக்கிறார்.
இந்த படத்திற்கு தற்காலிகமாக KH237 என்று தலைப்பு வைக்கப்பட்டிருக்கிறது. இந்நிலையில் இப்படத்தின் தலைப்பினை நடிகர் கமல்ஹாசன் ரகசியமாக வைரமுத்துவிடம் கூறியுள்ளாராம். இது தொடர்பாக வைரமுத்து தனது சமூக வலைதள பக்கத்தில் பதிவு ஒன்றினை வெளியிட்டுள்ளார்.
அதில், “நீண்ட நாள் கழித்து தனது நண்பர் கமல்ஹாசனை நேரில் சந்தித்து அரசியல், கலை, சமூக ஊடகங்கள் தொடர்பாக பேசினோம். அப்போது கமல்ஹாசன் தனது அடுத்த படத்தின் தலைப்பை தன்னிடம் சொன்னார். உடனே தான் அந்த தலைப்பை மாற்ற வேண்டாம் என்று சொல்லியிருக்கிறேன்” என குறிப்பிட்டுள்ளார்.
