JANA NAYAGAN: ஹெச்.வினோத் இயக்கத்தில் நடிகர் விஜய் தற்போது ‘ஜன நாயகன்’ படத்தில் நடித்து வருகிறார். இப்படத்தில் பிரகாஷ் ராஜ், பிரியாமணி, கவுதம் வாசுதேவ் மேனன், பூஜா ஹெக்டே, மமிதா பைஜு, நரேன் ஆகியோர் நடிக்கின்றனர். இந்தப் படம் விஜய் நடிக்கும் கடைசி படமாகும். இப்படத்திற்கு அனிருத் இசையமைக்கிறார்.
பிரபல தயாரிப்பு நிறுவனமான கே.வி.என் நிறுவனம் தயாரிக்கும் இப்படம் வருகிற அக்டோபர் மாதம் வெளியாகவுள்ளது. ‘அனிமல் மற்றும் கங்குவா’ படத்தில் வில்லனாக நடித்து அசத்திய பாபி தியோல் இப்படத்தில் முக்கிய கதாபாத்திரத்தில் நடிக்கிறார்.
இந்த படமானது அரசியல் தொடர்பான கிரைம் திரில்லர் கதைக்களத்தில் உருவாகி வருவதாக கூறப்படுகிறது. இப்படத்தின் படப்பிடிப்பு வேகமாக நடந்து வருகிறது. இந்நிலையில் நடிகர் விஜய் நடித்துவரும் ‘ஜன நாயகன்’ படத்தில் பிரபல இயக்குநர்கள் நடிப்பதாகத் தகவல் வெளியாகியுள்ளது.
மேலும், தமிழ் புத்தாண்டான ஏப்ரல் 14ஆம் தேதி இப்படத்தின் சிறப்பு கிளிம்ஸ் வீடியோவை வெளியிட தயாரிப்பு நிறுவனம் திட்டமிட்டுள்ளதாக கூறப்படுகிறது. இது விஜய்யின் கடைசி படம் என்பதால் அவருக்கு நெருக்கமான இயக்குநர்களான அட்லி, லோகேஷ் கனகராஜ், நெல்சன் ஆகியோர் சிறப்புத் தோற்றத்தில் நடிக்க இருப்பதாக கூடுதல் தகவல் வெளியாகியுள்ளது.
